ترکیہ کے صدر رجب طیب اردوان کے حالیہ دورۂ پاکستان کے دوران دونوں ممالک کے درمیان دفاعی تعاون کو مزید مضبوط کرنے پر اتفاق کیا گیا، جبکہ پاکستان نے ترکیہ سے جدید ڈرون طیارے حاصل کرنے کی خواہش ظاہر کی ذرائع کے مطابق، پاک-ترکیہ ہائی لیول اسٹریٹیجک تعاون کونسل میں پہلے نو گروپس شامل تھے، جن کی تعداد اب بڑھا کر گیارہ کر دی گئی ہے۔ اسی کونسل کے تحت ماضی میں پاکستان نیوی کے لیے چار بحری جہازوں کی خریداری بھی عمل میں لائی گئی تھی۔
دورے کے دوران، ترک صدر رجب طیب اردوان نے وزیر اعظم شہباز شریف سے ایک گھنٹے کی علیحدہ ملاقات کی، جس میں آرمی چیف جنرل سید عاصم منیر اور نائب وزیر خارجہ اسحاق ڈار بھی موجود تھے۔ اس ملاقات میں دونوں ممالک کے درمیان دفاعی اور تجارتی تعلقات کو وسعت دینے کے مختلف پہلوؤں پر غور کیا گیا۔
پاکستان نے ترکیہ کی جدید ڈرون ٹیکنالوجی میں ہونے والی پیشرفت سے فائدہ اٹھانے پر زور دیا اور ڈرون طیاروں کی فراہمی کی درخواست کی۔بعد ازاں، ایوانِ صدر میں ہونے والے عشائیے میں وزیر اعظم شہباز شریف اور تینوں مسلح افواج کے سربراہان بھی شریک ہوئے، جہاں دوطرفہ تعلقات کو مزید مستحکم کرنے پر بات چیت کی گئی۔
